Diskurso di Su Mahestat Rei Willem-Alexander (Papiamento)

Toespraak | 30-04-2013

Miembronan di Parlamento General,
Awe mi a bini boso Reunion Uní, pa keda huramentá i instalá komo boso Rei. Pa e motibu akí, komo representante di pueblo elehí, boso ta aki huntu den kapítal. Esaki ta simbolisá nos relashon konstitushonal.
Den transkurso di dos siglo e Reinado Hulandes a mara inseparablemente ku e demokrasia parlamentario. E instalashon akí i e huramentu ku mi ta hasi aki ratu, ta konfirmá e union ei, ku ta ankrá den e Statuto di Reino i e konstitushon.
Demokrasia ta basá riba konfiansa mutuo. Konfiansa di siudadano den su gobièrnu. Un gobièrnu ku por tene su mes na regla i ta brinda perspektiva. Pero tambe konfiansa di e gobièrnu den su siudadanonan. Un pueblo ku ta sinti su mes ko-responsabel pa e interes general i ta sali pa otro. Tur empleado públiko, sea elehí, nombrá òf apuntá mester aportá nan parti na e konfiansa ei. Asina ei ta mantené demokrasia.
"Pa gana konfiansa mutuo tin un tarea kontinuo den chikí i den grandi." Esei mi mama a menshoná den su delaster diskurso di pasku komo Reina. Trintitres aña largu el a duna konfiansa i no a abusá di e konfiansa hañá. Esei ta e base di su outoridat. E tabata para pa e balornan ankrá den e konstitushon i na kual el a mara su mes seremonialmente dia 30 di aprel 1980. E tabata duna realse na esei ora e tabata haña nesesario. Pasombra e echo ku e Rei no tin responsabilidat polítiko, no ta nifiká ku e no ta karga responsabilidat propio. Sino e huramentashon, ku aki ratu ami tambe lo hasi den e Reunion Uní akí, lo no tin balor.
Kerida Mama,
Bo tabata Reina kompletamente konsiente di e responsabilidatnan ku esaki ta mará na dje. Bo tabata henteramente dediká na e obligashonnan di bo funshon. Pero bo tabata tambe yu muhé, esposa, kabes di famia i mama. Na kada un di e responsabilidatnan ei tambe bo tabata ker a duna realse total. Esei a okashoná tenshon interno debesenkuando. Pero bo tabata sa di uni bo obligashonnan múltiple den un konteksto animá. Nunka tabata hasi un apelashon en bano riba bo. Tambe riba dianan di tristesa personal bo tabata un sosten di konfiansa pa nos tur na e manera di mas kariñoso.
Ku yudansa di mi tata bo a desaroyá bo mes estilo komo Lareina. Popularidat kòrtiku no tabata e kompas riba kual bo tabata biaha. Bo a mantené un rumbo stabil i puro pasombra bo ta sa di ta forma parti di un tradishon largu. Trankil meimei di momentu turbulento.
Mi ta sigui bo pasonan. Mi tin un bista kla di mi funshon. 'Kiko futuro por trese', niun hende no sa. Pero unda ku e kaminda bai i kon leu ku e mester hiba mi, bo sabiduria i bo kalor lo mi karga ku mi semper.
Mi sa ku mi ta ekspresá e sentimentu di hopi hende na Hulanda i di e partinan di Karibe den nos Reino ora mi bisa: danki pa tur e añanan bunita den kual nos por tabatin bo komo nos Reina!
Kada Rei ta duna su mes interpretashon na e funshon. E ta un otro persona, den un otro époka. Reinado no ta státiko. Den nos reglanan segun derechi estatal e por a adaptá su mes kontinuamente na situashonnan ku ta kambia. E espasio akí e ministernan i Parlamento General a ofresé e Rei tambe.
Alabes e Reinado ta un símbolo di kontinuidat i kolektividat. E ta un konekshon direkto ku nos pasado estatal, e tapeit di nos historia kaminda awe nos tambe ta sigui ila konhuntamente. Den historia nos ta haña e balornan ku nos ta kompartí ankrá. Un di e balornan akí ta trata e ròl sirbiente di e Rei. E Rei ta ehersé su funshon na disposishon di e komunidat. E realisashon profundo akí ta keda fihá pa Parlamento General ya na 1581 den e pláka di Verlatinghe, e akta di nasementu di lokual despues a bira Hulanda.
Mi ta drenta den un periodo ku hopi den Reino ta sinti nan mes vulnerabel i insigur. Vulnerabel den nan trabou òf ku nan salú. Insigur enkuanto nan entrada òf sirkumstansia di biba. Ku yunan ta bai tin un mihó bida ku nan mayornan, ta parse di ta ménos evidente ku ántes.
Kada ken riba su mes ta parse manera nos tin ménos grep riba desaroyo ku ta influensiá nos bida. Nos forsa no ta sintá den isolashon, pero den kooperashon. Komo famia. Komo amigu. Komo habitante di un kaya òf bario. Komo siudadano di nos Reino. I komo habitante di e mundu akí, ku ta keda konfrontá ku diferente enkargo ku por solushoná solamente riba relashon internashonal.
Unidat i diversidat. Ser úniko í tin e kapasadiat pa adaptá. Realisashon di balor di tradishon í kuriosidat na loke futuro ta trese. E karakterístikanan akí a forma nos na ken nos ta den transkurso di nos historia.
E nesesidat grandi pa eksplorá i preferiblemente ekspandé fronteranan a hiba nos leú! Sinku paisano spesial ta para símbolo pa esei. Nan ta yena akinan, awe, un ròl tradishonal, pero ta na mes momentu e prueba vital di loke nos ta kapas di dje.
Tras di nan ta pará shenmil otro ku ta distinguí nan mes na nan mes sistema. Nan aporte tambe ta indispensabel. E speransa di nos pais ta skondí den e interakshon harmonioso di tur e personanan ei, ku nan talento, grandi i chikitu. Inventividat, ánimo i frankesa ta nos forsa pa siglonan largu. Nos por ofresé e mundu hopi ku esaki.
Komo Rei mi ke enkurashá hende pa uza aktivamente e posibilidatnan ku nan tin. Kon grandi e diversidat ta, kon diferente nos konvikshon i soño por ta, sin importá unda nos lombrishi por ta derá, den e Reino Hulandes tur hende por laga skucha su stèm i traha konhuntamente riba nivel di igualdat.
Ku orguyo lo mi representá e Reino i yuda deskubrí oportunidatnan nobo. Mi ke hasi konekshon, señalá relashon i propagá loke ta uni nos, Hulandesnan, tambe den tempu di alegria grandi i tristesa profundo. Asina ei ami komo Rei por fortifiká e konfiansa mutuo entre siudadano i gobièrnu, mantené e demokrasia i sirbi e interes general.
Mi ta asumí e funshon akí ku gratitut. Gradisidu pa e edukashon ku mi mayornan a duna mi i pa e espasio ku mi a haña pa prepará mi mes pa e funshon akí. Hopi a yuda mi ku konseho i akto; tur mi ta yama danki.
Gabinetenan konsekutivo, sostené pa Parlamento General, a duna mi e posibilidat pa por tin un ròl propio riba diferente tereno di trabou. Asina ei mi por a hasi hopi den i pa Hulanda. E trabou ei a hasi mi konsiente di loke mi por nifiká den mi posishon. Tambe el a duna mi e oportunidat di atkerí un bista sólido den tópikonan ku ta fundamental pa nos pais, manera un maneho responsabel ku awa.
Eksperensia nashonal i internashonal a formá mi na ken mi ta. Ku konfiansa mi ta tribi bisa mi mes i mundu: mi ta aseptá e funshon akí ku konvikshon. Ademas mi ta realisá kon inmensamente felis mi ta ku sosten di mi kasá Máxima. E ta konsiente di e limitashon personal ku su posishon ta eksihí di dje debesenkuando. El a sera nos pais den su brasanan i a bira Hulandes meimei di Hulandesnan. E ta kompletamente dispuesto pa pone su númeroso kapasidatnan na disposishon di mi Reinado i e Reino di nos tur.
Miembronan di Parlamento General,
Awe nos ta konfirmá na otro nos responsabilidat i obligashon mutuo. E Statuto pa e Reino i konstitushon ta nos fundeshi kolektivo. Den añanan bon i ménos bon nos por sigui konstruí riba esei den konfiansa apsoluto ku huntu nos por enfrentá futuro ku kara na laria.
For di e konvikshon ei mi ke kuminsá komo Rei ku tur forsa ku a duna na mi.
Mi ta hura na e pueblonan di Reino ku kontinuamente lo mi mantené mi mes i konservá na e Statuto pa e Reino i konstitushon.
Mi ta hura ku lo mi defendé i konservá e independensia i e teritorio di e Reino ku tur mi forsa; ku mi ta proteh'é e libertat i derechonan di tur Hulandes i tur residente, i utilisá tur medio ku lei ta pone na mi disposishon pa mantené i promové prosperidat, manera ta obligashon di un bon i fiel Rei.
Ku Dios todopoderoso lo yuda Mi!